由於香港落後過澳門，遲遲未推出十五年免費教育，家陣仲話要研究研究再研究喎，所以小朋友入讀幼稚園仍然有必要繳付昂貴學費，貴到牙痛咁聲嘅家長叫苦連天。除咗學費之外，幼稚園又會收取各式各樣嘅雜費，乜嘢生日會費呀，乜嘢畢業禮費呀，種類繁多，不勝枚舉。最令功夫茶感到莫名其妙嘅係，幼稚園雜費之中竟然有一項「寢具費」，莫非園方兼營「時鐘酒店」？小朋友返學讀書之餘，仲會幫襯「純粹租房」？
○七年開始實施學券計劃之後，教育局為幼稚園學費設立上限，學校利潤不得超過成本價百分之十五。審計署發現，大部分參加學券計劃嘅幼稚園收取嘅學費接近上限，四分一半日制幼稚園學費每年超過二萬三千元。如果迫於無奈冇得收取超過上限嘅更多學費，而幼稚園經營者又想賺得愈多愈好，可以點樣做呢？冇錯嘞，巧立名目收取唔係學費嘅雜費。
審計報告指出，調查過一百二十一間幼稚園之後發現，冇披露嘅雜費項目佔整體雜費嘅六成，有幼稚園聲稱每年雜費係八百八十八元，但實際係一千四百二十三元，較原先講好嘅價錢高出六成。個別幼稚園嘅雜費收入相當於學費收入嘅四成四，數額動不動以千萬元計，部分學校將雜費撥歸「其他營運收入」，藉此避過利潤規管嘅上限。
簡單咁講，現時教育局嘅規管存在一個極大嘅漏洞，你唔准幼稚園收得太多學費吖嘛，園方就兜個圈濫收雜費，學前教育變成一盤商機無限嘅牟利生意。望子成龍嘅家長肉隨砧板上，你話寢具費咪寢具費囉，唔通質疑校長因乜事幹要阿仔阿女返到學校大被同眠咩！
規管存在漏洞嘅意思就係話，教育局袞袞諸公失職囉，任由幼稚園將學生家長當作人肉提款機。喂，教育局只針對學費及利潤設立上限，對於雜費就隻眼開隻眼閉，如果你係教育界之中嘅無良奸商，你都會立心不良走法律罅啦，正所謂咯喎，人不為己，天誅地滅！
再講吖，即使以學費收入同成本價掛鈎都有問題。假設正常成本價係一千萬元，你點知有冇人絞盡腦汁將成本價刻意增加至一億，從而收取十倍嘅學費？所以教育局局長吳克儉真係有必要好好反省o架，千祈唔好繼續擔當一個「唔得掂局長」。你知啦，教育事業關乎子子孫孫嘅幸福，若然局長持續表現得規管太廢，好大可能禍延下一代o架。
不如咁啦，功夫茶代表天下父母心向吳克儉呼籲，有漏洞就要堵塞，有失職就要補鑊，關鍵係盡快落實十五年免費教育，千祈唔好再誤人子弟呀！