政情：公民講場：「大花筒」領導 廉署酒肉混帳

本報早前獨家踢爆前廉政專員湯顯明在任五年期間耗用四百萬元公帑外訪，後來佢更被發現多年來花咗廿二萬元公帑送禮畀各地官員，被指做法離譜，質疑係咪有咁嘅需要。呢單嘢被揭發冇耐，審計署尋日又發表報告狠批廉署喺二○一一年有兩次宴會嘅開支，超過一般規定嘅晚餐每人不得多於四百五十元，其中一餐每人開支更達一千多元。點知廉署大玩「財技」同「開支偽術」，將超出規定嘅酬酢開支分開計數不特止，仲將部分紅酒開支由酬酢費改為活動宣傳費用，真係無賴兼乜都佢講晒，證明廉署真係無王管嘅獨立王國。如果啲公帑可以亂咁使，咁湯顯明在任時請埋佢老細「貪曾」前特首曾蔭權爵士去飲紅酒、歎鮑魚都得o架啦！