去年「十一」南丫島海難造成三十九人死亡，有市民形容當日為「港殤」，當康文署早前發出新聞稿話搵機構贊助煙花活動時，有市民就促請港府停止「十一」煙花，網上亦引起激烈討論。身在北京嘅民政事務局局長曾德成尋日同傳媒總結北京之行時，首度開腔回應話會聽取各方面嘅意見，似乎口風鬆動咗少少。
當被問及依家政府係咪正在搵緊「十一」煙花贊助商嘅時候，曾德成就話去年「十一」煙花發生南丫海難事件，港府同市民對海難所引起嘅傷亡事故都感到非常沉痛，佢完全理解呢方面嘅心理，但有關「十一」活動一定會進行，至於活動嘅方式會聽取各方面嘅意見。至於會否考慮暫停煙花匯演，曾德成再三強調正在聽取各方面的意見，又指政府前日有簡短聲明，其實亦係同一意思，再無其他補充。
盡快決定 以釋疑惑
依家「十一」係咪放煙花嘅問題，開始受到立法會議員同網民關注，曾德成等港府高官稍一不慎，或者處理不當，隨時會引來軒然大波，睇怕當局都係適宜盡快有個決定，唔使等大家喺度估估吓。