政情：羅范拒做醫管局主席
做咗公務員敍用委員會主席八年嘅吳榮奎，原定本月任期屆滿，先後傳出有機會由行政會議成員羅范椒芬或前食物及衞生局常任秘書長李淑儀接任。另外醫管局主席胡定旭嘅任期亦將於今年十一月底屆滿，有傳羅太亦係接掌呢個位置嘅大熱人選，但羅太尋日就一一否認傳聞。
羅太昨出席「議會內外」節目後一次過澄清傳聞，自言無諗過做呢兩個位置，其中醫管局主席一職「好困身」，即使有人搵佢都唔會做，反建議應由醫學界中人出任喎。政府早前宣布吳榮奎延任公務員敍用委員會主席一年，對於有指特首否決李淑儀接任傳聞，羅太引述可靠消息話，並非特首有任何反對，惟未有透露反對者是誰。
形容佔中係姿態
身兼港區全國人大代表嘅羅太喺節目又談及二○一七普選特首提名委員會，佢相信會繼續維持四大界別組成，因涵蓋絕大部分行業，又引述有意見話，依家由政府提出建議方案諮詢市民，將會容易變成「箭豬」，強調政府依家要做好前期工作，就係聆聽各方意見。羅太又形容「佔領中環」行動係姿態，重申談判須逆向思維同妥協，「用暴力不會有好結果」。