政情：田二少揼本 擴新西版圖
做地區工作人力物力缺一不可，新民黨立法會議員田北辰（田二少）打滾商界多年，自然明白呢個遊戲規則。據聞最近佢搞個復活節活動，淨係派糖畀小朋友都使咗八萬元，另外又揼本幫新加盟嘅區議員聘請助理，加強地區服務。該黨近日仲成功拉攏到元朗區議會副主席、有「村屋大王」稱號嘅王威信入黨，似乎該黨銳意喺新界西擴大政治勢力版圖，唔通佢哋想連取兩個議席？
田二少出晒名夠搏，成名作係前年參加「真人騷」，落區體驗清潔工人嘅貧苦生活，進身「雙料議員」行列後，繼續喺新界西招兵，地區工作仲好揼本添。話說上月復活節期間，田二少就聯同救世軍舉行「田叔叔糖果屋」活動，但最特別嘅係，佢分別喺新界西自設十個、八個攤位，邀請家長與小朋友一齊自製糖果杯，如果小朋友鍾意可以拎走，否則轉贈畀救世軍送畀有需要嘅人。
搵元朗「村屋大王」做樁腳
有人估計呢次派糖最少用成廿萬元，但我哋問過田二少，佢話前後都用咗唔夠八萬元，只要街坊開心有得着喎。此外，田二少連黨內區議員同地區幹事有冇足夠人手做嘢，都列入其視線範圍。據聞佢會調派人手幫助其他新界西區議員，甚至黨內有區議員最高峰時都有三個助理幫手，呢個理應係立法會議員助理嘅陣容，相信會羨慕死好多資源較為匱乏嘅政黨喇！
人力物力缺一不可，所以田二少除咗揼本，仲搵咗元朗區議員黃卓健幫手物色有潛質嘅樁腳入黨，黃卓健早前已經搵咗屯門區議員蘇嘉雯入黨，最近又搵埋王威信加入。王威信係律師，家族專幫發展商收購物業，喺元朗區內有「村屋大王」稱號，而且仲係鄉議局執委，更係元朗足球隊嘅總領隊，有番咁上下人脈，早年佢退出自由黨後一直保持獨立身份，本身係委任區議員嘅佢今鋪轉投新民黨，好可能都係為轉戰直選鋪路。