中環出更：唐唐買咖啡 巧遇Tim霍
全國政協常委唐英年（唐唐）一向都鍾意去中環咖啡店買咖啡，咁啱卓妮尋日又遇到佢喺中環太子大廈嘅一間咖啡店現身，身穿西裝冇打領呔嘅唐唐，手臂夾住一本雜誌，生活認真寫意。
喺唐唐行到收銀處買咖啡之際，突然電話響起，莫非係同樣鍾意歎中環啲咖啡嘅唐太郭妤淺打畀佢，叫佢多買一杯？佢接過電話之後就發現卓妮嘞，仲好有禮貌咁向卓妮展示佢個金牌笑容，同埋揮手打招呼添。
此時，前立法會議員霍震霆（Tim霍）忽然喺店內一個角落閃出嚟，兩人打招呼後喺收銀處前傾咗幾句。之後唐唐攞住杯凍飲離開，而Tim霍就行到櫃枱，準備買飲品。卓妮仲以為只有唐唐係咖啡發燒友，估唔到熱愛體育嘅Tim霍都鍾意去中環歎咖啡，睇嚟下次佢哋兩個可以約埋一齊喎。
卓妮