中環出更：霍震宇恤髮 電腦不離手
已故全國政協副主席霍英東長房三子霍震宇確係個超級電腦迷，除咗鍾意行電腦店舖外，連去剪頭髮都電腦不離手。卓妮早前有晚行經中環ifc時，見到佢坐喺一間髮型屋入面剪髮，一般戴眼鏡嘅人去剪髮時，好自然會先除低副眼鏡方便髮型師，但霍震宇就一直戴住眼鏡，直至髮型師剪到佢耳邊頭髮時，佢先肯除低眼鏡，剪完又匆匆戴番，原來佢正在聚精會神用緊手提電腦上網。
全程耷頭 懶理剪成點
當晚接近八點鐘，霍震宇急急腳咁走入髮型屋，一氣呵成咁除低外套、穿上剪髮袍，同髮型師講話想洗剪吹，之後就坐定定等剪髮。期間佢幾乎全程都耷低頭，沉醉於網絡世界之中，似乎唔多理會自己個頭剪成點。
霍震宇本身短頭髮，髮型唔難剪，四十五分鐘就大功告成，之後佢收起部電腦，對住塊鏡照幾下，睇嚟相當滿意，同髮型師傾咗幾句就付款離開。
卓妮上前同霍震宇打招呼，佢話之前都有幫襯過呢間髮型屋，貪個地點夠就腳，收舖時間又比較晏，有時自己喺公司收工收得夜，都可以順路過去剪髮喎。卓妮仲留意到髮型屋洗剪吹價錢係三百九十元，仲提供埋免費wifi，唔怪得吸引到霍震宇幫襯喇。
卓妮