俗語話，嫁出去嘅女，潑出去嘅水。有啲嘢講咗就係講咗，做咗就係做咗，已成既定事實，冇得收番o架。呢嗱，人稱漢奸嘅李柱銘反口覆舌，出爾反爾，成日自打嘴巴，終於又出醜喇！
件事係咁嘅。隨着二○一七年特首普選逐漸逼近，關於預選或篩選嘅問題，北大人同香江反對派各執一詞，拗到面紅耳熱。早已退出政壇嘅李漢奸不甘寂寞，失驚無神提出一個「跪低」方案，聲稱願意接受沿用選委會提名方式，先選出五名候選人，再畀市民投票喎，佢仲話呢個係「最後底線」添。點知跪低方案一拋出，即時引來反對派狂插，連佢自己創立嘅白鴿黨都要同佢劃清界線。結果相隔一日，變色龍上身嘅李漢奸就跪低認衰，高調開記者招待會宣布「收回」方案，五時花六時變，仲兒戲過細路仔玩泥沙。喂，講咗就係講咗，好似潑出去嘅水，仲可以收回嘅咩？簡直九唔搭八！
聽吓李漢奸自己點樣解畫喇。佢承認做法鹵莽，冇深思熟慮，至於點解會「老貓燒鬚」，佢就解釋唔到，淨係話可能係因為「心靈疲倦」喎。其實正如有人話齋，心靈疲倦係假，思維錯亂就真，心靈疲倦好易解決啫，多啲休養咪得咯，至於思維錯亂咯喎，咁就無藥可醫囉。
講開又講，李漢奸一向反口覆舌，自打嘴巴已經唔係第一次嘅喇。當年董建華突然「腳痛」落台，新特首嘅任期究竟應該點計，引起各界爭議，建制派提議人大釋法，反對派就認為應由香港自己解決，正當雙方爭持不下，一向逢中必反嘅李漢奸居然喺電台節目中高調支持人大釋法，成個北京代言人咁款，搞到好多人仲以為聽錯添。而更奇怪嘅係，僅僅相隔兩粒鐘，李漢奸就自己推翻，聲稱感到後悔，要求收回釋法言論，仲話自己之前「未瞓醒」，所以講錯喎。
咁都得？一時未瞓醒，一時心靈疲倦，李漢奸稟神冇句真，信佢一成都死喇。所以話，江山易改，本性難移，漢奸就係漢奸，連面皮都特別厚，出爾反爾，言而無信，鍾意就亂噏，唔鍾意就收回，簡直唔知醜字點寫。唔怪得有人話漢奸可以兼職做小丑，又識變態，又識變臉，話變就變，唔只令人眼界大開，仲令人眼花繚亂添。
功夫茶諗極都唔明，李漢奸都一把年紀喇，好話唔好聽，已經屬於老而不嗰種，點解仲咁鍾意胡言亂語呢？自己知自己事，既然未瞓醒而搞到心靈疲倦，咪喺屋企淨心休養，發個春秋好夢囉，無謂再出來現世，盞嚇親其他人嘅咋。一句講晒，李漢奸你已經out咗喇，早抖罷喇！