支聯會前主席「華叔」司徒華離世數年，但有沙田區議員喺社交網站自爆日前獲「司徒華」到訪，莫非真係咁詭異？其實此「司徒華」係新上任沙田警區警民關係組嘅助理警民關係主任，因為司徒警長係喺九龍城調過沙田，所以初來甫到點都要去同啲沙田區議員打聲招呼嘅。
司徒警長前日就拜訪新民主同盟沙田區議員丘文俊（Man），阿Man話，唔知警長係咪知道自己個名會被人攞嚟講笑，刻意好低調咁自我介紹，淨係喺派卡片給人的時候自稱姓司徒。
阿Man當時冇細心睇張卡片，因此大家傾咗十幾分鐘，佢都唔知「司徒華」近在眼前。
之後阿Man聽到同事提起，先喺社交網站分享話「司徒華先生今日來拜訪」。同係新同盟嘅立法會議員范國威亦都講笑留言話：「華叔復活了！」其實白鴿黨張文光過往都提過識得一位都係叫「司徒華」嘅老師，呢位老師過往返親內地都喺過關時遇阻滯。