政府連日公布多個委員會嘅成員名單，其中第一代「公職王」鄭慕智（Moses）同香港大學校委會主席梁智鴻（金刀梁），分別親掌免費幼稚園教育委員會及標準工時委員會。相信大家都有同感，點解政府嘅公職來來去去都係由呢班人輪流擔任呢？兩位年紀都唔細，但仍然畀政府多個朝代循環再用，唔通香港真係冇肯做公職嘅人才？
雖然Moses作風低調，但人面極廣嘅佢，早喺○九年獲委任為離職公務員就業諮詢委員會主席時，一度被質疑一人同時擔任七項公職，違反一般人只能同時擔任六份公職、任期唔可以連續超過六年的「六六規定」。雖然佢事後澄清否認，喺當時卻掀起一場小風波。不過，Moses曾經出任中學校董，加上又係教統會主席，今次主理幼稚園教育改革都不無道理。
至於年屆七十三歲嘅金刀梁，雖然曾任行政會議成員、立法局議員及前醫管局主席，就連新上任嘅平機會主席周一鑊，亦係由金刀梁擔任遴選委員會主席，親自領軍選出。雖則話金刀梁行政經驗豐富，公職勝任有餘，但今次由佢掌管同工人權益關係密切嘅標準工時委員會，就真係大纜都扯唔埋，亦正反映肯擔任公職嘅人才凋零現實。