接收戒毒學生嘅正生書院，早幾年因為爭取擴建校舍失敗後，校長陳兆焯亦較少喺公開場合曝光。尋日下午約三點四十五分，我哋就見到陳兆焯入咗中環ifc商場，急急腳搵咗間日本餐廳坐低醫肚，佢應該係啱啱由大嶼山芝麻灣校舍搭船到港島。望落佢好似激瘦成個碼，唔知身體健康點樣呢？我哋上前同佢打招呼，佢笑稱自己冇病冇痛，只係打羽毛球減肥喎！講起近況，嚟緊佢將帶正生書院學生到日本交流。陳兆焯唔止鍾意食日菜，連交流都揀去日本，睇嚟佢都算係「哈日族」喎！
