政情：教師團訪滬撞正疫情 葉Sir逼食足7日牛
內地爆發H7N9禽流感，上海亦係災區之一，當大家都人心惶惶、盡量都唔返內地嘅時候，立法會教育界議員葉建源（葉Sir）就偏偏拉大隊，同班小學老師遠赴上海交流。咪以為葉Sir咁大膽，其實佢都係出發咗先知上海「中招」，仲搞到喺上海成個星期雞肉又唔敢食、豬肉又唔敢食，幾乎食足七日牛肉咁話，最後都平安歸來。
「上館子」謝絕「掃街」
葉Sir上星期同一班小學老師一行十一人參加咗香港教育學院搞嘅上海交流團，同當地嘅小學交流，既然出發後先知當地爆發H7N9禽流感，去到自然非常小心，一於唔食豬肉、唔食雞肉、高危嘅禽鳥更加掂都唔掂，仲連大家出門旅行好鍾意嘅「掃街」都唔敢去，謝絕街邊小食同生冷食物。
葉Sir仲話，因為擔心當地嘅食物衞生，佢哋咁多日都淨係「上館子」，去啲望落企理嘅餐廳，同埋淨係食牛肉同蔬菜，最多都係叫啲煮熟咗嘅海鮮。咁樣食足七日，難怪葉Sir話自己食牛食到厭喇。