政情：選舉論壇救亡 考起官員
近年選舉論壇候選人之間出現疊聲同謾罵嘅情況時有發生，候選人同市民開始反感同投訴。選舉管理委員會近日披露去年立法會選舉同傳媒相關投訴急增，其中涉及選舉論壇嘅投訴，更由四年前三宗急升近十三倍至三十八宗，負責選舉嘅政制及內地事務局局長譚志源同選管會主席馮驊認真要諗吓計救亡，當中關鍵係點樣平衡選舉公平原則同傳媒編輯自主，真係少啲政治智慧都諗唔掂。
3宗變38宗 急飆13倍
港府最近向立法會提交文件，披露去年九月立法會選舉期間，選管會收到二百三十七宗投訴，當中一百五十六宗唔滿意有節目或報道有偏頗、不公平陳述同評論，另外七十六宗認為有關傳媒機構發言時間、報道或出鏡安排給予候選人不公平或不平等對待。另外值得留意嘅係，相比○八年立會選舉只有三宗投訴，去年立會選舉就有三十八宗投訴涉及廣播機構舉辦嘅選舉論壇，其中有三十二宗涉及選舉論壇對候選人不合適或不公平評論。
對於選舉論壇投訴數字上升呢個新生事物，港府未敢視而不見，有人率先提出有兩方面可以諗吓，第一係研究係咪需要制訂指引，特別就節目製作同播放安排，包括主持形式、發言時間安排等作出規限，第二係應否給予主辦機構更大自由度邀請部分或全部候選人參加其選舉論壇，尤其當競逐候選人數目相當多嘅時候，相信係避免出現聲疊聲嘅混亂情況。
話時話，譚志源同馮驊要諗出兩全其美嘅方法解決問題，都未必係咁容易嘅事，事關如果主辦機構可以選擇只邀請部分候選人參加選舉論壇，到時或者會畀人口實話有篩選之嫌，加上選舉本身秉持公平及平等對待原則，傳媒本身亦有編輯自主同製作自由，點樣可以喺兩者取得平衡，呢個真係好考功夫。不過，距離下屆立法會選舉仲有幾年時間，譚志源等人冇理由諗唔到解決辦法嘅，除非短期內又有議員辭職搞補選嘅啫。