中環出更：研廣華歷史 李三元幫文獻除蟲
慈善機構東華三院係百年老店，歷史古仔多籮籮，就連前主席李三元（John）都喺裏面搵到題材來做論文題目。話說阿John係超級歷史迷，早前佢仲重返大學讀歷史系碩士，估唔到愈讀愈有癮，近日一於加碼，報埋個博士班，而論文題目都交埋，就係研究廣華醫院歷史。
加以「數碼化」唔怕揭爛
大家都誤會阿John喺廣華出世，但佢話廣華屬東華一部分，感情分都加唔少。加上廣華歷史橫跨一世紀，足以反映香港醫療發展史變遷。不過，研究過廣華歷史嘅人唔多，阿John開筆前要睇大堆廣華文獻，部分已封晒塵，所以佢已聘請專人為文獻除蟲，再將文獻數碼化，咁就點揭都唔怕爛喇。
為保育東華珍貴歷史檔案，阿John帶頭捐出一百萬元支持東華嘅「歷史文化基金」，而東華就決定將該院文物館地下辦公室命名為「東風破紀念堂」，以答謝其支持。點解個辦公室唔用阿John個名命名呢？阿John笑言，《東風破》係佢任內推動拍攝嘅東華一百四十周年紀念電影，所以更有代表性喎。