中環出更：「中山」代代有叻人 各領風騷
雲集富二代嘅香港中山青年協會，眨眼成立兩周年，日前舉行聯歡晚會大玩「金色年華」主題，逾二百位「中山幫」到賀，包括孫中山家族第五代後人孫偉勇（Kevin）同永安百貨家族後人郭永義（Sean），前仁濟醫院主席陳耀星公子陳湛偉（Vincent）就擔任協會主席，陣容強勁。
孫中山後人笑稱唔搞革命
Kevin笑言唔會搞革命，但背負「名人之後」四個字壓力都唔小，從小提醒自己要行正道、做正事，唔好失禮先祖。Kevin依家擔任一間酒店管理公司嘅總裁，事業有成。
要數中山叻二代，仲有畢業於美國麻省理工嘅Sean，佢繼承爸爸郭志舜衣鉢做建築師，香港有唔少著名建築，好似如心南灣海景酒店都係出自佢手筆。郭家喺中山有投資房地產及酒店，難怪Sean熟晒地頭喇！
主席陳湛偉來頭都唔細，佢係哈佛商學院高材生，從事金融生意，家族喺中山開製衣廠，又係另一位「中山地膽」。當晚冇出現嘅中山名人，查實仲有前保安局局長李少光、民政事務局常秘楊立門、中總榮譽會長蔡冠深等。
創會及榮譽主席吳傑莊話，中山人才濟濟，美食更係多籮籮，好似中山石岐乳鴿、小欖鯪魚球、神灣菠蘿、脆肉鯇魚等，佢計劃年底首次喺黃大仙舉辦「中山節」，推廣美食之餘，仲搵嚟專人表演著名「舞醉龍」，等港人大飽眼福。
卓妮