愛國愛港再次成為政壇熱話，左派人士多次上晒子彈發炮，講明同中央反抗就一定唔係愛國者。行政會議成員陳智思（Bernard）就喺社交網站分享咗自己去西安睇兵馬俑同遊覽華山嘅相片，其實陳智思都去過好多國家遊玩，周不時都會去美國添。
但偏偏喺陳智思嘅社交網站入面，除咗佢出席活動嘅相之外，所有旅遊相片都係喺內地影嘅，反映Bernard嘅社交網站係經過精心設計。
Bernard本身係番書仔，又係泰國華僑，雖然中文唔太叻，但唔代表佢唔熟悉國情，佢尋日喺社交網站，就貼咗去華山、洛陽，仲有西安兵馬俑嘅旅行相，而且清一色係內地富歷史味道嘅古城，唔係一般嘅大城市，睇嚟Bernard都十分喜愛有五千年歷史嘅中國文化，仲唔係愛國嘅表現？
不過唔知係咪Bernard不諳中文嘅關係，所有相片都係用英文寫簡介。但其實亦可以掉番轉睇，佢嘅對象唔止係華人，而係識英文嘅人，用英文去推廣中國文化，同傳統嘅硬銷愛國好唔同。聽聞Bernard近年積極學中文，唔知進步咗幾多呢？