警方最近從英國買入幾十部隨身攝錄機，方便佢哋隨時拍攝混亂情況，當初引入時已惹起爭議，好多市民都怕有白色恐怖。
政府為咗安撫市民，就話隨身攝錄機主要係拍攝示威或者黑社會打鬥場面，但點知有網民影到前日喺碼頭工人遊行時，警方已經靜靜雞地用咗隨身攝錄機（箭嘴示）。
社運界一直對隨身攝錄機有好大意見，有網民就好心水清，發現前日聲援碼頭工人嘅遊行已經有唔少警察嘅胸口掛有隨身攝錄機，有社運人士即時影低做證。
觀乎前日嘅遊行，任何激烈示威都無發生，唔通警察覺得遊行隊伍入面混有黑社會？定係警隊日後有理無理都會影咗先？
