八網難逃：唔怕禽流廖偉芬無「罩」闖滬
H7N9禽流感喺華東地區大爆發，上海更出現多個確診個案，搞到人心惶惶。不過廖創興家族後人廖偉芬（Jennifer）就膽識過人，為睇一場世界級咖啡師大賽，日前勇闖上海。佢話，當地人一啲都唔緊張，不但無戴口罩、無擺漂白水消毒盤，唔少人照樣食雞，佢都食埋一份喎。
睇沖咖啡比賽
經營精品咖啡店嘅Jennifer，近日喺社交網站Facebook上載一張遊上海嘅相片，嚇到好友紛紛留言，催促佢盡快返香港，搞到Jennifer啼笑皆非。佢話，出發前疫症未爆發，去到上海先知咁大鑊，不過當地氣氛完全唔緊張，比賽現場根本無人戴口罩，亦無人談論禽流感，最後佢決定如期留低。佢大讚中國咖啡師超水準，沖咖啡同拉花技巧都拍得住港人。
上海人愈來愈鍾意飲咖啡，Jennifer都有意喺度插旗，此行順道睇埋舖，朋友帶佢睇外灘等黃金地段，搞到佢心郁郁。但上海租金直逼香港，係咪開舖，要再諗真啲嘞。