「佔領中環」相信係未來一年香港政壇嘅大議題，其實除咗政界關心佔中會否成事外，商界之中最擔心嘅就係一班專搞對沖基金嘅Fund佬，事關絕大部分嘅對沖基金都靠電腦程式操作，萬一香港嘅信貸評級因為佔中而被降級，好多大型投行嘅電腦程式都會自動「散貨」，Fund佬自己都唔能夠插手，屆時眼白白望住個市跌一兩成，散戶又跟住恐慌性拋售，分分鐘爆發新股災。
有商界中人話，有評級機構自從喺二○一一年，將香港信貸評級定為最高級嘅AAA後，自此未變過，令香港金融股市好似坐火箭咁升，而要維持呢個級別，首要條件係政局穩定，若然下年真係發生佔中，評級好大機會下調。由於評級下調毫無先兆，所有對沖基金短暫嚟講都會極速散貨，務求減輕風險，屆時散戶唔清唔楚，一定跟風掟貨，金融界只會哀鴻遍野，成地蟹貨，受害嘅只係小市民。
至於會唔會有機構因佔中而撤資，該商界人士話就算機構撤資都唔會咁早出聲，因為愈早講撤資，可能要將債務提早找數，所以若撤資都係一夜間嘅事，不過佢評估機會好微，始終香港好難長期混亂。