政府新聞處前年起趕上潮流尾班車，開設YouTube、微博等社交媒體戶口，想話同廣大網民拉近距離，但睇怕只係政府一廂情願。
政府喺提交立法會財委會特別會議嘅文件透露，新聞處嘅YouTube頻道自前年開設以來，得嗰二千幾人訂閱，三千幾條上載短片嘅「收視」亦少得可憐，大部分只係得幾十個，甚至幾個點擊，政府宣傳手法似乎同網民口味唔多夾喎！
不過，新聞處喺內地嘅微博戶口就有成六十幾萬「粉絲」，估唔到港府喺內地嘅人氣仲高過香港。另外，政府去年分別推出手機應用程式「香港政府通知你」同一站式平台「政府App站通」，成效係點仲未知，但原來兩個平台合共使咗一百九十萬元開發，對比一般Apps嘅開發成本只係幾萬元，政府可謂相當揼本。
喺議員題問中，工聯會議員鄧家彪建議政府幫住喺海洋公園嘅稀有動物搬屋，好似將大熊貓搬去康文署轄下嘅公園飼養，咁基層家庭就可以免費睇熊貓嘞，佢嘅建議咁九唔搭八，作為政府，真係不知從何答起。