政情：廉潔政府全賴無貪曾
前特首「貪曾」曾蔭權爵士喺在任時瘋狂外訪，佢任內嘅外訪開支超過一千萬元。除咗貪曾自己洗腳唔抹腳、視納稅人嘅血汗錢如無物外，佢嘅管治團隊亦都上樑不正下樑歪，頻頻外訪。以財經事務及庫務局局長陳家強為例，上屆任期佢個人嘅外訪開支就達到一百九十四萬元，係局長中嘅「大使之冠」。不過佢聯同佢嘅決策局喺上個財政年度外訪嘅實際開支就只有六十六萬六千元，同前年比足足減咗五成半。唔通貪曾卸任後大家都有所收斂﹖
貪盡最後一分鐘嘅貪曾喺任期最尾一、兩年瘋狂外訪，而佢嘅管治團隊亦有樣學樣。好似民政事務局局長曾德成同環境局前局長邱騰華就喺五年任期外訪六十次，成為「雙冠軍」。陳家強雖然只外訪咗四十三次，但就係上屆政府中外訪最大花筒嘅局長。民建聯立法會議員李慧琼就喺審核政府二○一三至一四年度嘅開支預算時，向財經局（庫務科）及轄下部門官員嘅外訪、酬酢及使用私家座駕開支提出質詢，睇下喺今屆政府連任局長嘅陳家強係咪照舊咁大使。
陳家強酬酢開支減少
不過陳家強踏入現屆政府，似乎就有所收斂。根據財經局回覆，決策局連同局長辦公室喺一一、一二年度官式外訪同考察等活動嘅實際開支係一百四十九萬元，但一二、一三年度截至二月底共十一個月就只係六十六萬六千元。除非三月份超豪使錢，否則外訪實際開支只係上一年度嘅四成半。而佢哋喺本港境內嘅酬酢開支亦有所減少，一二、一三年度實際開支為十萬九千五百元，比對上一個年度嘅十四萬五千元減少兩成半。
除咗陳家強，政制及內地事務局局長嘅外訪開支都大幅回落，上個財政年度開支八十七萬元，比起高峰期嘅一○、一一年度，少咗六十萬。不過要講清楚嘅係，一○、一一年度適逢世界博覽會，開支較多。
白韞六外訪申報清楚
前任廉政專員湯顯明係貪曾老友，一樣貪威識食，但現任專員白韞六作風好唔同，佢依家已經可以白紙黑字講清楚今年外訪兩次，分別係印度新德里同巴拿馬，兩次嘅隨行人員分別係四人同五人，開支一共十三萬元。