中環出更：盧維思巧遇鍾普洋 雞啄唔斷
曾一度公認係前特首曾蔭權嘅愛將，但最終喺維港巨星匯醜聞中被對方離棄，成為「替死鬼」嘅前投資推廣署署長盧維思，自從退咗休之後好少露面。卓妮早前喺中環街頭遇到佢，見佢神情輕鬆，精神抖擻，睇嚟佢對於嗰次事件所帶來嘅憤怒與不快已經淡忘喇。當日佢仲巧遇DHL亞太區創辦人鍾普洋（Po），兩人一碰面即雞啄唔斷，似乎交情匪淺。
一齊等過馬路 邊行邊傾
有一日下晝三點幾，卓妮見到着住西裝、拎住公事包嘅盧維思一支公現身皇后大道中街頭，佢氣定神閒咁往金鐘方向行走，行到中建大廈對開停低，企定定等過馬路。與此同時，一身「上海灘」打扮嘅Po就咁啱喺一間英國連鎖零售店買完嘢出嚟，抽住一大袋嘅戰利品，同盧維思撞個正着。雙方好似久別重逢嘅老友，好熱情咁打招呼，更互相寒暄一番。
佢哋兩個愈傾愈興起，橫掂順路，佢哋索性邊行邊傾，仲講到指手畫腳，七情上面，期間Po打開手上嘅購物紙袋，畀盧維思睇吓自己買咗啲乜。大約同行咗五分鐘之後，Po先至同盧維思分道揚鑣。