中環出更：康熙御製盌6500萬元易主
正所謂千金難買心頭好，稱得上世上碩果僅存嘅清康熙御製胭脂紅地琺瑯彩蓮花圖盌，尋日喺拍賣場上以高價六千五百萬元成交，刷新清康熙瓷器拍賣紀錄。話說這件稀世珍品，係前全國政協常委、有「政壇富婆」之稱嘅張永珍割愛出售，新主人則是多次喺拍賣競投上與張永珍「交手」嘅著名古董收藏家、永寶齋「齋主」翟健民。
新主翟健民 連佣7400萬元投得
對於投得靚古董，翟健民滿心歡喜話好難得搵到一件咁完整、咁細緻嘅康熙古玩，仲話賣價好合理，同佢心目中個價仲有一段距離，「唔會好貴，只要係好同真嘢都值得買！古董嘅嘢，即使今日買得貴，明日個價已經唔同！」
該件康熙珍品尋日開價四千萬，隨即有人承接，叫價十一口後以六千五百萬元成交，連佣達七千四百萬元。拍賣行蘇富比指，該盌估計係康熙在位最後十年嘅作品，當時康熙從西洋工匠看到琺瑯彩嘅技巧，命人製造此盌，其後放喺書齋等私人地方，只供皇帝賞玩。該盌顏色鮮艷、畫花圖案獨特，盌嘅四邊沒有重複花紋，可形成一張卷畫，拍賣行估計當時康熙最多只做咗一對，但至今全世界只搵到呢一件，就算係咁完整嘅康熙琺瑯彩其實亦唔多。
翟健民話，該件珍品喺近年拍賣場上只出現過三次，第一次喺八三年以五十二萬八千元成交，其後九九年再次釋出市場，翟健民已經對佢一見鍾情，當時礙於財力及心情，最終被對手以一千二百萬元投走。今次重現拍賣場，原本係張永珍兄長、著名收藏家兼骨董商張宗憲嘅舊藏，佢志在必得。佢話作為收藏家，古玩唔似基金，應該要睇長線，難得獲得心頭好或者五年後先再轉讓，到時可能又會賺「一個開」！
卓妮