自從發生埃及樂蜀熱氣球慘劇之後，大家都對旅遊保險多咗關注。有位負責旅遊政策嘅高官就話，因為佢鍾意打高爾夫球，所以都經常喺去旅行時順便打埋波，故此佢出門去玩除咗會買旅遊保險，一份關於高球嘅保險亦都唔少得。
而呢位高官買嘅高球保險亦都好全面，連好手勢時一桿入洞，要請同場參賽者食飯嘅「損失」都有得賠，間保險公司咁細心，抵佢賺錢。
呢位高官同我哋講，佢係高球愛好者，唔止喺香港經常打波，去到外地旅遊，打波都係佢嘅指定動作。不過高球都係一項有風險嘅運動，所以唔少保險公司都有推銷有關高球嘅保險，呢位高官當然都有買呢類保險以防萬一啦。不過高官嘅保險就一啲都唔講得笑，人哋一般嘅高球保險都係保跣腳、扭親，唔小心受傷呢啲嘢，但佢嗰份就好特別，除咗打波工具有得賠，就連打到一桿入洞都有得保。
高球波友之間有個習慣，就係如果打到一桿入洞，就要請全場參賽者食飯。高官為免荷包受損，所以買嘅保險就包埋「賠償」請食飯嘅金錢損失。其實如果真係咁好身手都值得高興，請食飯又有咩所謂吖。