政情：八網難逃：潘佩璆遊台體驗良多
工聯會副會長潘佩璆自從去年十月無做立法會議員後，月旦時事無以前咁多包袱，好似佢最近到台灣旅行，都要就兩岸關係評論一番，反駁部分台灣人嘅「維持現狀」立場，強調兩岸關係嘅「現狀」正在快速蛻變，包括喺幾年實現咗三通，依家台灣酒店都可以收看內地電影台，兩地學生亦有頻繁交流等，呢啲變化清楚顯示國家對和平統一嘅強烈意願同自信喎。
訪士林想起社會流動性
潘醫生喺社交網站透露，上月底曾到台北遊玩多日，到過故宮博物院、淡水情人橋等當地名勝，其中喺故宮博物院除咗欣賞著名嘅「肥豬肉」和「大白菜」，亦見到無數內地旅行團到訪，將博物院部分熱門展區擠得水洩不通，要輪候半日先睇到。
佢喺淡水街頭食店又遇上從北京來台嘅大學交換生，對方同佢講呢個交換計劃已運作多年，令佢深深感受到兩岸關係已變得非常密切。
潘醫生見識完士林夜市嘅盛況之後，又語帶感慨話台港兩地相比，台灣有更多空間畀小本經營者發揮，社會流動性更大，值得香港借鑑。玩幾日都諗到咁多嘢，潘醫生真係心繫家國、先天下之憂而憂囉！