H7N9禽流感肆虐華東地區，死亡率極高。好多香港市民都擔心傳染病襲港，西貢區區議員方國珊（哪吒）近日自資四萬幾蚊買咗一萬個口罩，免費派畀將軍澳居民。哪吒話口罩好快就派完，其實九牛一毛，都好過無嘅。
禽流感再現搞到港人人心惶惶，雖然現時無證據證實H7N9可以人傳人，但政府聲稱已經有百幾萬個口罩以備不時之需，哪吒話眼見政府無乜舉動，自己即刻磅水買咗一萬個口罩，呢幾日都喺將軍澳派街坊，將傳染同感染機會降至最低。哪吒仲話自己專登買比較貴嘅N95口罩，每個口罩成本要成四蚊，但為咗街坊健康，貴少少都值得，最開心係口罩好快派晒，證明街坊都有好高防疫意識。
雖然有網民話哪吒抽水，事關今次禽流感未發現人傳人個案，派口罩都無乜用，包住口罩嘅膠袋仲印住方國珊個名添。不過哪吒就話特登買N95口罩，係因為N95除咗可阻擋細菌外，最大功能就係過濾大部分塵粒，啱晒將軍澳居民，因為佢哋日日要飽受堆填區帶嚟嘅廢氣同微塵粒子，就算無禽流感都可以用得着——用一日咁多喇。