政情：李惠利爭地戰 街坊撐第三方案
九龍塘前李惠利校舍地皮爭奪戰，成為九龍塘居民最關心嘅議題，政府想話起住宅增加房屋供應，浸會大學就話想興建中醫學院，雙方爭論咗都成個月，浸大話政府漠視中醫發展，政府又話唔批地畀浸大係因為佢無正式申請，拗嚟拗去好似無人理過當區居民意願。原來當區居民有第三種諗法。
浸大校長陳新滋大打悲情牌，話如果幫唔到浸大爭取地皮，分分鐘會引咎辭職，但政府就決定要將幅地放入去勾地表，當區區議員何顯明就批評，政府嘅決定無理過區議會係咪反對，簡直無視居民意見。何顯明話，收集過居民意見後發現，佢哋根本唔想塊地起樓，認為當區已經大把住宅，中上價嘅豪宅都有唔少，如果最終用嚟起樓，樓價都唔低得去邊，小市民難以負擔，建議做第二樣嘢仲好。至於浸大興建中醫院，何顯明話大部分市民都無乜意見，只係覺得塊地皮咁大，如果畀晒浸大做醫院，似乎有啲浪費。
咁到底做乜好？原來地區人士認為應該起多一間社區會堂。何顯明話現時九龍塘有唔少中產居民，但一個社區會堂都無，老人中心都係得一間，反而鄰近嘅深水埗有十幾個社區會堂，老人院亦多不勝數，令九龍塘區內市民搞活動好唔方便，所以區內居民睇中李惠利入面嘅禮堂，希望將佢改造成社區會堂用，屆時居民就有個公共空間搞社區活動，政府亦唔使拆晒成座禮堂咁浪費。不過政府無諮詢地區意見，一嚟就話要列入勾地表。
傳周一嶽曾應承建中醫院
其實爆發李惠利爭地事件，政界仲有一個傳聞，就係話當年浸大打算起中醫院，曾經同過時任食物及衞生局局長周一嶽傾，點知周一嶽無理後果一口答應，仲拍晒心口話大力支持。浸會諗住有高官撐腰當然開心啦，點知原來所託非人，周一嶽連官都無得做，當然無法幫浸大搵地，令教育局唔知道浸大想喺李惠利搞中醫院，最終拖下拖下先爆出今次爭地風波。陳新滋一直話有高官應承佢，但講唔出係邊個，原來係周一嶽令佢有難言之隱。