政情：名人北上 慎防「禍從口入」
內地H7N9禽流感肆虐，唔少名人經常北上傾生意，都齊聲話要慎防「禍從口入」。尋日卓妮喺沙田馬場見到理文造紙董事總經理李文斌（Edmond），經常要上東莞公幹嘅佢坦言頗擔心疫情，為咗工作惟有頂硬上，隨身袋定消毒潔手液及口罩。不過佢話，最重要係小心飲食，佢話內地經常以攪碎豬肉冒充牛肉及羊肉，佢一定唔會幫襯街頭串燒，寧願食多啲菜當減肥。
尋日Edmond與父母及哥哥李文恩（Norman）齊現身，兩兄弟各有愛駒出賽，最終Norman名下嘅「包裝博士」後來居上捧走獎盃，穩袋一百七十多萬元，Edmond睇見哥哥贏馬，開心到跳起。尋日鴻運當頭嘅仲有冠軍科技集團主席簡文樂（Paul），其名下新馬「伽楠」以半冷姿態跑出。問Paul點樣預防疫症？佢笑言，禽流感唔關佢事，皆因佢係茹素喎！
簡文樂茹素 自覺更年輕
Paul透露，自己茹素已有二十六年，當年佢偶然戒食一星期肉，之後食番竟然覺得好腥，佢就此求醫，醫生答佢：「唔食肉冇問題吖！」認為人類身體結構本來就應該素食，於是佢一直茹素至今，仲話茹素令佢更年輕。愛沙尼亞駐港名譽領事林建康（Matthew）至少每月一次往上海公幹，佢話唔擔心感染疫症，但會盡量避免進食禽鳥類。佢覺得上海作為一線城市，醫療設備完善，況且上海地方咁大，幾千萬人當中有幾個人染病，絕不出奇。
卓妮