政情：騸雞遊峇里不忘股市
立法會喺復活節假休會，多名議員都趁機同家人外遊叉電，其中單仲偕（騸雞）就同老婆齊齊遠離煩囂，去咗印尼峇里島玩咗四日，潛水睇珊瑚歎世界。不過一向投資有道嘅佢，外遊都帶埋本投資書去酒店睇。尋日港股因內地禽流感威脅而大跌，唔知佢點睇呢？
劏雞今次已經係第四次到訪峇里，第一次要追溯番去廿六年前，有時自己去，有時同家人去，有時同朋友去，總之去極都唔厭，最鍾意係喺當地做SPA同潛水，仲有包車遊山同品嘗當地嘅特產貓屎咖啡，夜晚睇陣書就上床瞓覺，認真識歎。
對於港股尋日因為內地禽流感疫情而大跌咗六百幾點，劏雞就自言中長線仍然睇好港股，認為今次只係升咗一段時間之後，借勢中場調整，建議投資者唔好自亂陣腳，騰騰震急急放晒啲貨，當然如果係炒「即日鮮」嘅人就例外喇！