政情：李澤鉅晤墨西哥總統
香港出名多貴客，正在本港訪問嘅墨西哥總統恩里克‧培尼亞‧涅托（Enrique Pena Nieto），尋日除咗去過禮賓府同特首梁振英舉行咗雙邊會談之外，又同喺墨西哥投資達八億美元、即約六十二億港元嘅長實集團董事總經理兼副主席李澤鉅會面。
合共長逾3200米
長實集團回應傳媒查詢，證實李澤鉅尋日下午同墨西哥總統見過面，並透露長實同和黃喺該國投資咗多個國際貨櫃碼頭，包括維拉克魯斯及曼薩尼約、聖樊尚、恩塞納達等，合共嘅碼頭長度長達三千二百多米，泊位多達十五個，僱員人數有約四千二百人。
其中位於維拉克魯斯港嘅維拉克魯斯國際貨櫃碼頭（ICAVE），係該港口嘅主要樞紐和轉口港，處理維拉克魯斯約八成貨櫃吞吐量，以及整個墨西哥國內嘅兩成貨櫃運輸，係當地最繁忙嘅碼頭之一。