政情：黃家和斥滬港防疫鬆懈
內地變種禽流感H7N9疫情持續升溫，其中上海係最多感染個案同最多病人死亡嘅地方，原來香港餐飲聯業協會會長黃家和（Simon）早幾日咁啱去咗上海公幹，好彩返嚟後身體無唔妥，大家唔使緊張。
Simon爆料指，當地居民對疫情消息版本多多，有內地朋友就向佢發短訊，話除出現大批死豬外，亦傳過上海有牛隻大規模死亡。不過做開飲食界嘅佢並無特別驚，繼續好似往常咁周遊當地嘅大街小巷，發現上海徐匯區小販仍當街販賣同宰殺活家禽，未見有特別處理措施。前日佢由疫區返港時，亦無人特別查問佢從邊度返嚟，覺得滬港兩地都對疫情相當鬆懈。佢叮囑兩地政府吸取十年前沙士嘅慘痛教訓，強調處理疫情最緊要係迅速，寧願做到「過火」都好過做漏。
內地爆發變種禽流感，歐洲同中東就有新沙士，但做慣「空中飛人」嘅Simon未有因而減少周圍去，未來仍會繼續「每月一飛」，本月將去法國，下月到印度新德里，六月去美國加州。Simon真係要保重身體，唔好感染傳染病，否則病毒好快就會跟住佢散播全球！