政情：馮檢基高大空 市民有排窮
今屆政府重設扶貧委員會（扶委會）討論全民退休保障同其他貧窮問題，被泛民主派同部分基層團體質疑係「拖字訣」，事實上扶委會同轄下小組召開咗幾次會議，都仲未有乜實質政策或建議出到嚟，其中原定可以好快訂立到嘅香港首條「貧窮線」，就因為民協立法會議員馮檢基等委員有不同意見，而遲遲未能達成共識。不過有立法會議員認為，其實立法會設立嘅扶貧小組委員會（扶貧小組），仲廢過政府嘅扶委會，矛頭同樣直指身兼扶貧小組主席嘅馮檢基，批評佢成日掛住研究埋啲「高大空」嘅學術性貧窮問題，幫唔到貧苦市民解決燃眉之急。
嘥時間做「阿媽係女人」研究
立會扶貧小組委員人數多達廿三人，即係有三分一議員都有入會，當中泛民同建制派約各佔一半。有委員私下埋怨，扶貧小組至今已經開咗好幾次會，都傾唔到乜嘢實質成果，部分委員認為係同主席馮檢基嘅能力同作風有關，質疑小組討論嘅議題欠缺時事性，當政府扶委會已經傾緊「貧窮線」定義同開始探討全民退保，小組就仍然喺度討論「房屋與貧窮的關係」、「教育與貧窮的關係」等虛無縹緲嘅議題，嘥晒大家嘅時間同口水。政府方面亦愈嚟愈唔將扶貧小組放在眼內，列席官員愈嚟愈低級，根本代表唔到政府答問題同做決策，令唔少議員做到無晒癮，出席率同發言次數每況愈下。
有議員特別提到，馮檢基特別鍾意吩咐立會秘書處幫佢做埋啲「阿媽係女人」嘅研究，浪費秘書處嘅時間同資源。有議員就相關課題喺會上質詢出席官員，希望迫使政府做嘢，馮檢基居然叫啲官唔好答住，等秘書處匯報下佢哋自己嘅研究結果先，變相幫咗政府解圍，激到提問者生蝦咁跳。
為免繼續畀馮檢基帶住佢哋遊「扶貧花園」，有議員曾建議邀請身兼政府扶委會主席嘅政務司司長林鄭月娥出席會議，交代扶委會進行緊嘅工作，再加以施壓，但馮檢基似乎好唔想畀扶委會嘅議程同工作進度牽住走，對此頗為抗拒，淨係識得警告若官員唔肯出席，就去信譴責對方，令其他議員摸不着頭腦。
據聞唔單止班工商界同建制派議員不滿馮檢基嘅處事手法，連泛民內部都有意見，有人就提議喺今個立法年度結束後踢走馮檢基，改由現時身為扶貧小組副主席嘅公民黨張超雄坐正。不過，張超雄現時身兼立會融合教育事宜同長期照顧事宜小組委員會嘅主席，即使佢想亦好難再分身做埋扶貧小組。