節儉係一種美德，但係吝嗇就唔係咁好喇。據聞喺全港十八個區議會入面，其中有人「真人不露相」。佢平時外表睇嚟好豪爽，但原來為人非常「鐸叔」，尤其對住當區居民，就更「鐸」。
有熟悉當區嘅人士透露，嗰區不時會搞啲聚會嚟聯誼街坊。而每逢喜慶日子，嗰位區議會主席就會贊助街坊嘅紀念品，或者抽獎禮品，但每次嘅禮品都總是大失參加者所望。因為佢送嘅嘢唔係轉贈人哋本來送畀佢嘅禮物，就係一啲快要過期嘅食品，總之派嗰啲人見到眼突，收嗰啲人見到口都窒。
不過，嗰位主席耐唔耐先會疏爽一次。幾時？咪就係當有喺西環工作嘅人員出現嘅時候囉！聽聞有一次，佢事前話會送出十支名酒作為抽獎禮物，點知最後只贊助兩支「雜嘜」酒，其餘八份就係啲唔同花款嘅贈品。最後，突然有西環人士出現，佢就好識做咁即時喺口袋掏出現金獎五千蚊，搞到大家不知幾開心。
有關人士就話，其實禮品貴重與否並不重要，但係送啲就快過期嘅食品，而街坊一不小心食咗落肚之後有事嘅話，咁就唔係太好啦！