之前有傳媒利用新聞資料庫Wisenews統計議員見報次數，發現新民黨副主席田北辰（田二少）見報率冠絕其餘六十九位議員。雖然已經事隔四個月，但可能新民主同盟范國威（Gary）仍然對此事耿耿於懷，於是佢尋日就借立法會運作近半年為由，統計十三位直選新丁去年十月至今嘅見報率。
根據Gary調查發現，田二少依然以一千二百幾條新聞遙遙領先，排第二同第三嘅分別係見報八百幾次嘅Gary同七百五十幾次嘅人民力量陳志全（慢必），而民建聯新界西兩位新丁梁志祥同陳恒鑌就齊齊排包尾。
除咗用見報率高低將十三位新丁排等級，Gary仲抽絲剝繭研究田二少成為曝光王嘅原因，佢話睇番首五位曝光新人王喺兩份傳統左派報章嘅見報次數，發現田二少嘅見報率竟然多過泛民議員足足三倍，於是就暗寸對方之所以成為曝光新人王，都係靠左派報章所賜。
Gary總結話，左派報章對田二少寵愛有加，令田二少亦用「三權分立亦屬對抗」等連成龍都望塵莫及嘅言論回敬對方。其實立法會係一個議論政事，而唔係畀議員搏出鏡爭見報嘅地方，況且曝光率高唔代表議員好勤力，見報率少亦唔代表有人偷懶唔做嘢，強行製作排行榜將大家互相比較又何必呢？