政情：訪韓參觀社企 EQ考察定係睇袋？
女人果然係天生購物狂，去到邊都鍾意shopping，就算唔買都要睇吓。前往南韓考察當地廢物回收措施嘅環境局同立法會環境事務委員會訪問團，尋日去咗當地一間著名二手商品店參觀，間商店係一間社企，叫做Beautiful Store，期間議員葛珮帆（EQ）對一個由當地設計師以廢棄男士西裝同皮具改造而成嘅手提電腦袋特別感興趣，攞上手又摸又度，但最後佢嫌個袋太男性化同太大個，自己又用開平板電腦，決定唔買。
EQ嘅黨友兼團友鍾樹根就無咁好彩，佢喺起行時已經有啲唔舒服，尋日更感冒病情惡化，需要喺當地睇醫生。南韓當局已因應中國大陸爆發禽流感而提升警戒級別，唔知根哥使唔使接受相關測試同接受隔離觀察呢？
毛孟靜開會摺紙鶴失禮
議員團有十幾人，來自唔同黨派，原來可以起互相監察嘅作用，尋日有「密探」同我哋爆料，話毛孟靜開會時嫌悶，竟然喺度摺紙鶴，臨走仲將隻紙鶴留喺枱面添，佢咁唔尊重個會議，認真失禮人。