政情：真普聯都設篩選機制
真普選聯盟成功拉攏廿七位泛民立法會議員加入後，下一步將向民間組織招手以及組成一個學者顧問團，料顧問名單將於兩至三個星期後公布。不過，真普聯眼前有個更加迫切嘅問題要解決，就係商議入會機制。
真普聯召集人鄭宇碩尋日出席一個論壇之後話，佢哋下次開會，將會商議加入篩選機制，意味着真普聯都係要經過篩選機制先至可以加入。
原來泛民組織如民陣同前普選聯都慣設加入門檻，例如要先經成員推薦，確保大家目標理念一致，至於真普聯加入機制如何，鄭宇碩話無可奉告。
不參與策劃「佔中」
有指部分金融機構正在為「佔領中環」作出風險評估及應變部署，而民主黨何俊仁尋日喺同一場合就話，聽聞連投資公司亦有作類似部署。
但何俊仁重申，若果普選方案符合國際標準，「佔中」實可避免，但係真普選若不能夠推出，一場「社會爆炸」就會發生，佢希望掌權者可以用一年時間好好冷靜，唔好咁驚成日都以為泛民好有興趣選特首。
不過鄭宇碩一聽到「佔中」就劃清界線，話真普聯對佔中嘅立場係不參與策劃但支持。