政情：貪曾卸任照舔到盡
「貪曾」前特首曾蔭權爵士任內貪盡海陸空，歎盡省港澳嘅劣行人所共知，殊不知佢卸任特首後仍要「舔到盡」，榨乾榨盡前任特首辦公室嘅資源，將公務同私務混為一談處理。此外貪曾太太曾鮑笑薇亦疑「夫唱婦隨」，過去以特首夫人身份多次對隨員唔多禮貌，貪曾伉儷無論有無官職在身都有風使盡，難怪耐唔耐總有人將佢哋嘅惡行公諸於世。
東方報業集團去年二月獨家踢爆「貪曾」貪盡海陸空嘅醜聞震撼政商界，不過貪曾嘅惡行一不離二，原來佢仲有鋪使人唔使本嘅心癮，事關貪曾當時入住禮賓府時，對裝修方面要求多多，之後貪曾嘅家庭同私人事務都要政府中人處理埋一份，當時大家都對此敢怒不敢言，貪曾當然唔會檢討自己嘅不是，仲會以為自己係做緊皇帝。
曾太被揭藏兩箱浴帽
貪曾如此有風使盡，身為貪曾枕邊人嘅曾太亦有相同氣質。話說曾太當年貴為特首夫人本身亦活動多多，理應對支援同事多啲包容，豈料曾太態度一般，唔係特別客氣。
兩公婆去年六月三十號前搬離禮賓府時搬走嘅逾千箱細軟中，除咗有大量侵吞得嚟嘅茅台外，令人睇到目瞪口呆嘅，原來仲有曾太嘅兩大箱各式各樣嘅浴帽，唔知係咪去豪華外訪時「搜集」番嚟嘅紀念品，工作人員對此蔚為奇觀，奔走相告。
貪曾卸任特首後，政府仲未可以「脫苦海」，因為其實貪曾依家如果喺香港，就去位於半山嘅前任特首辦公室打躉，佢已經一無所有，惟有喺呢度發吓夢，以為自己仲係大權在握。佢幾乎將公務私務留晒喺前任特首辦度做，最常見嘅做法就係用前任特首辦嚟見各界人士，究竟當中有幾多係必要會面嘅無人知。
之前我哋已經收到料，話佢搬入前任特首辦前，要求多多，包括巨型電視、酒櫃同上網設施等，搞好晒啲設施，依家就去歎世界。貪曾人去茶涼之後仲要「舔盡」官方嘅資源，認真係「江山易改，品性難移」嘅典型寫照。