中環出更：「熨斗大王」靠食好住好挽人才
「熨斗大王」東保集團主席陳鑑光喺內地設有工廠，有時喺內地長假之後，工人放完假之後都會一去不返，面對呢個棘手問題，陳鑑光就諗到條好橋留住工人，就係「食好住好」嘞。
陳鑑光話，以前開工廠，只需要計好盤數就掂，依家冇咁簡單。佢話工人嘅要求高咗好多，要挽留人手，就要從食堂同宿舍質素着手。以前工人買餸自己煮，依家唔單止要有飯堂，食物仲要好味；以前有熱水用已經好滿意，依家要全天候熱水供應。聽落好似好簡單，但工廠幾千個工人，假若全部同一時間開熱水，都幾頭痕。
經營成本增五成
唔單止食住要好，陳鑑光話，仲要提供埋全面康樂設施，請舞蹈專家開班教跳舞，又要保證有高速上網，仲要劃分出一條俗稱「綠道」嘅單車路，方便工人踩單車做運動。陳鑑光嘆謂，經營成本因此大增五成，但都冇符，皆因做廠嘅致勝之道，就係起貨效率比人快、產品質素比人好，為今之計就只有投其所好，冀望增加員工歸屬感，以提升工作效率。
卓妮