中環出更：「零售女王」置新裝心情靚
有「零售女王」之稱嘅香港零售管理協會主席麥瑞琼(Caroline)，洞悉市場行程之餘，對最新時裝走勢亦瞭如指掌，務求做個至潮女強人。尋日公眾假期，卓妮行經中環置地廣場，咁啱見到Caroline走入一間法國名店搜尋心水時裝，準備迎接炎炎夏日，佢滿場飛揀衫又揀鞋，更與店員打成一片，心情勁靚。
尋日下午三點，身穿紅色褸配黑色長靴嘅Caroline一個人現身置地廣場，步履輕鬆咁閒逛。佢搭電梯到商場地庫，經過一間著名法國時裝店時，目光極速畀櫥窗內嘅新裝吸引住，然後一個箭步入咗去試衫。店員一見貴客光臨，紛紛上前大獻殷勤，仲同佢傾偈傾到搭晒膊頭，好明顯佢係呢度嘅熟客。
剛去完越南傾家族生意
Caroline喺店內逗留咗大半個鐘，幾個店員貼身服侍，當佢試緊件天藍色恤衫嘅時候，店員又拎咗對紅色休閒鞋畀佢試着。佢試過覺得幾滿意，於是就咁着住對新鞋喺店內慢慢揀，望完衫又睇手袋。最後Caroline扑錘買咗兩件衫、一對鞋，離開名店時，幾個職員仲送到佢出門口，認真服侍周到。
卓妮上前同Caroline打招呼，見佢兩手空空，原來佢話啲衫唔係太啱身，要改過尺寸先至拎得喎。Caroline透露，自己剛剛去完越南傾家族生意，前日先至返港，所以趁空檔添置新裝。卓妮留意到佢十隻手指指甲都唔同顏色，認真潮。
卓妮