對很多打工仔來說，工資就像大姨媽，不管多少，每月都會來一次，一周左右就沒了，甚至隔日轉帳就沒了！然而，對於禽流感，即使十年再來一次，可是，它不會一周左右就沒了！
話說，黃浦江那些投江的豬冤魂未消，現在發威了──全球首次發現人類感染H7N9病毒事發上海。豬瘟未消，禽患又至。奪命新種禽流感在華東大爆發，全國確診患H7N9禽流感人數飆升至九人，當中上海兩人死亡，杭州一人死亡，目前尚有大批嚴重肺炎病人留醫各市醫院。
香港高官一味高喊不排除新流感會大規模爆發，要有心理準備，會加強防範喎！之不過，政府來來去去得把聲，卻未能急市民所急，在疫情洶湧撲來前，完全沒提及注射疫苗，亦沒有針對性地就旅客、學生、老人和幼童作出安排，連最基本教導如何加強防範亦欠奉，咁睇嚟市民真係要「有心理準備」，政府擺到明幫唔到大家！
港產官僚把關敷衍了事，彰彰明甚，記者發現唔少深圳雞販教港人以「拖水」方法攜帶半生不熟嘅雞過關，結果橫行掂過，通行無阻，如此把關確令人把鬼火！
非常時期應該有非常措施，政府各部門都應該高度戒備，自動自覺着緊些，而唔係自動自覺發多些廢噏，先為自己問責安全買保險。
食衞局局長高永文話會加強檢測進口活雞及本地家禽，不過，佢就話以現時技術，只能驗到H5及H9，未能做到H7病毒，咁即係點？即係驗又死，唔驗又死！
香港人，自求多福吧！呢排少啲返內地，注意個人衞生，勤洗手多消毒。咪話老朽唔提醒：下周學校假期後復課，家長送仔女回校，如果見到學校冇為學生測度體溫，冇消毒液叫學生洗手，請立刻帶仔女回家，學少陣好過搵命博！