政情：劉佩瓊教路買「人仔」「催眠」大會頓時醒晒
今年兩會會期已經過去，新界地區事務顧問協會尋日趕尾班車搞咗場兩會講座，邀請幾位人大、政協分享吓兩會經歷，但由於議題太過八股，台下好多觀眾都「搵周公」。唯獨係港區人大代表劉佩瓊發言嘅時候，台下即刻醒晒，原來係劉教授同大家分析市況，話現時正係買入人民幣嘅黃金時機，因為人民幣只會愈嚟愈升值，有排都唔會跌。
指新領導人更熟金融
本身喺大學教金融嘅劉佩瓊，本來係分析國家過去十年嘅經濟發展，呢個議題比較有深度較易催眠，台下唔少人開始釣魚。
但一講到人民幣三粒字時，台下觀眾對眼即刻發晒光咁留意，劉佩瓊話人民幣已經「跌穿八算」，升幅只會愈來愈高，好難有回落嘅迹象。
佢解釋因為新上任嘅一批領導人，比起上一屆政府更熟悉金融財經，所以未來人民幣個勢只會愈嚟愈好。
其實劉佩瓊做咗咁多年人大，講嘢都十分圓滑，今次公開講上屆政府金融方面唔夠呢屆熟，唔怕得罪人，唔知係因為人去茶涼唔怕講，定係佢刻意要講白啲，驚死台下觀眾聽唔明，失去買入人民幣嘅機會嘞。