政情：立會餐廳推限位令
港府早前急推「限奶令」引起部分立法會議員反對，認為港府應從源頭着手增加奶粉供應同打擊內地水貨客，而唔係一刀切限制所有人攜帶奶粉出境。言猶在耳，立法會餐廳將於下周一起推行「限位令」，限制非立會人員喺中午食飯時間「佔領」餐廳內嘅座位，唔知呢個「限位令」會唔會好似「限奶令」咁，最後搞到一鑊粥呢？
捍衞員工溫飽需要
我哋前排率先踢爆，由於添馬艦政府總部餐廳喺午飯時間經常逼爆，加上選擇唔多，嚟嚟去去都係碟頭飯，價錢仲貴過立會餐廳幾蚊，所以近月有大批喺政總返工嘅中基層公務員，假借進入立會圖書館搵資料，喺取得訪客證後就去咗立會餐廳食飯，最後成功「佔領」咗大半個餐廳，而且仲瞬間掃晒啲熱門平價飯，令真正嘅立會人員無啖好食。
為咗優先照顧立法會嘅「本土」利益，捍衞最基本嘅溫飽需要，立會餐廳決定下周一起試行「限位令」，由每日嘅中午十二點半至一點半，將不少於一半嘅座位預留畀立會議員、助理、秘書處職員同記者使用，即使街外客成功衝關入到立法會範圍，亦唔保證搵到位食飯，會視乎情況再決定是否永久推行。