中環出更：博愛潘治忠 盼做主席承父業
日前博愛醫院董事局早前舉行慈善聚餐，主席潘德明夫婦、身為總理嘅妹妹潘美蘭及公子潘治忠（Raphael）齊現身。博愛啱啱喺呢個月換屆，潘德明卸任，笑言心情複雜，皆因過去呢一年身負重任壓力大，但過程多彩多姿，留低唔少美好回憶。Raphael透露爸爸落咗莊之後，自己仍會留守喺博愛，為慈善繼續出力，目標係做到主席，延續父親服務大眾嘅宏願。
近日學打高球修身
Raphael話，加入博愛大家庭後，學識咗唔少危機應變嘅技巧，仲結識到各行各業嘅好友，對工作好有幫助。佢話最近回巢打理家族地產生意，面對政府近日推出嚴招遏抑樓市炒風，佢坦言樓市交投係淡靜咗，不過前景依然樂觀，事關市民始終對房屋需求大，政府施政尚有調整空間，相信樓市唔會大跌。本身喜愛運動嘅Raphael近日跟爸爸學打高爾夫球，享受箇中帶來嘅成功感，順便修身。
卓妮