中環出更：高佬賢腰圍細資歷淺
香港地質面貌變化多端，新界東北部附近島嶼更列為世界地質公園。喺啱啱過去嘅復活節，民建聯陳恒鑌（Ben）同漁農界何俊賢（高佬賢）就喺西貢黃石碼頭搭船出海，沿途欣賞赤洲及黃竹角咀瑰麗獨特嘅岩石形態，之後再到吉澳、鴨洲呢兩個生態旅遊勝地上岸遊覽。業界選民散遍全港嘅高佬賢不時周圍去拜訪選民，佢話平時都可以用私家車代步，但如果佢嘅目的地係人迹罕至嘅島嶼，就要搵漁民朋友用快艇載佢一程，所以現時欠下唔少「人情債」。
去到吉澳呢個極富漁村風味嘅小島，高佬賢指明要一嘗當地傳統特產鹹魚仔、手打墨魚丸及客家炆豬肉，豎起手指公大讚好味。佢話漁民性格率直豪放，通常見面嘅第一句話就係：「食咗飯未？一齊去食啦！」所以「食飯」就幾乎成為佢會見選民嘅指定動作。
Ben倡設50億旅發基金
雖然高佬賢經常要同漁民食飯，但係佢就話自己「食極唔肥」，入立法會咁耐都係重咗一公斤咁大把。佢引述前輩話，業界除咗憑年紀睇出一個人嘅資歷外，腰圍都會係佢哋嘅參考條件之一，正因為咁，腰圍「豐厚」嘅前漁農界代表黃容根被公認為資歷極深，而高佬賢就謙稱自己有排都未追得上前輩。
高佬賢十年前喺英國伯明翰大學完成大學課程，依家就喺中山大學攻讀碩士課程，主修公共行政。佢透露課程雖然只得三年，但佢就斷斷續續讀足五年咁耐，而佢啱啱就寫完碩士論文，遲啲仲要上廣州交論文同進行碩士論文答辯，如果一切順利嘅話，今個夏天就可以成功畢業。
平日嘅吉澳大街巷空街靜，只有假期先可以吸引遊客「登陸」。Ben就建議政府投放五十億設立旅遊發展基金，資助唔同島嶼發展生態旅遊，等市民唔使個個星期都逼喺大嶼山、長洲咁辛苦。
卓妮