唔少立法會議員都會趁住復活節假期外遊歎世界，民建聯蔣麗芸（Ann）都有離開香港去遊埠，早兩日仲喺社交網站上載一張喺工廠前影嘅相。阿Ann話自己呢幾日唔係去咗玩，而係聯同一班朋友去長江三角洲考察港商喺內地設廠嘅情況，又好感嘆咁話希望香港都可以發展本土工業。
雖然阿Ann講到好認真，但張相下面大部分留言都幾無聊。有人叫阿Ann入地盤前要做足安全措施戴頭盔，有人就無厘頭咁話「時光一去永不回，往事只能回味」，又講番八國聯軍及日本侵華嘅歷史，真係睇到人一頭霧水。
不過，有市民就話創意產業、高新科研等工業喺香港仍然有發展空間。阿Ann就回應話香港要發展高增值工業，陸續取代傳統勞工密集嘅工業，又話既然亞洲其他三小龍都做到，相信香港一定做到喎。