政情：廢腑之言：廢官未上任先辣火頭

人貴自知，但呢種自知之明唔係人人都有，「廢官」周一嶽就係其一，佢今日愚人節正式上任做平等機會委員會主席，但佢尋日未上任已經亂發炮，炮轟教育局過去咁多年對少數族裔嘅教育工夫做得唔足，令大批少數族裔青少年讀唔到大學，減少向上流動同晉升機會。如果就咁聽佢講，分分鐘以為佢係憂國憂民嘅一等一好官，但周一嶽好似忘記咗，佢上年仲係政府中人，而且位列局長級數，但佢就扮晒自己無做過政府，將所有責任推卸畀人，佢任內大把醫療事故、食品出現問題等大鑊嘢，但似乎無聽佢有任何反省，依家都未上任，就向教育局開火，究竟有乜說服力呢？