政情：與印傭拉近距離劉佩宜靠食增溝通
廣東話一向係公認難學嘅語言，唔少定居本港嘅少數族裔就因為言語不通而遭受歧視，難以求學及融入社會。香港女青年商會會長劉佩宜（Pauline）就諗到用食物作為雙方嘅交流工具，佢話同屋企嘅印尼工人姐姐不時請對方品嘗吓彼此嘅美食，又會教佢炮製地道菜式，拉近彼此距離之餘，自己仲可以乘機學番幾句印尼話。
教少數族裔「字母操」
該會尋日喺理工大學舉行勵志電影籌款放映會，善款將會撥捐畀聯合國難民專員公署，改善少數族裔難民嘅生活。Pauline話，其實香港大部分少數族裔都聽得明中文，但係寫同講方面就比較弱，事關佢哋怕講得唔好會惹來嘲笑。該會有見及此，嚟緊將由本地義工開班教授一套「字母操」，即係將中文拆件成為二十一個「字母」，配合簡單嘅手勢同口訣，等少數族裔兒童更易掌握，希望佢哋快啲學好中文，可以同港人「同聲同氣」。
副會長陳立言就透露該會未來一連串有關少數族裔嘅活動，當中有別開生面嘅「難民體驗日」，畀參加者模擬難民嘅艱苦生活，親身感受吓流離失所嘅無助與徬徨。