政情：轉危為機賺人仔 製藥業落重本起廠
人人都話香港工業式微，但係估唔到內地層出不窮嘅食品危機，凸顯咗港產良心藥品嘅可貴，意外帶旺本港老牌製藥廠紛紛落重本，喺本港覓地起廠，擴大香港製造藥品嘅生產基地。
匯聚知名老牌藥廠嘅中華製藥總商會早前舉行理監事就職典禮，該會理事長兼京都念慈菴第二代揸弗人謝國昌話，公司啱啱喺元朗工業邨新建樓面面積達廿五萬呎嘅GMP廠房。佢話由於內地消費者對內地製造或包裝嘅藥品疑心好重，寧願長途跋涉到港掃貨，所以佢決定落重本喺香港擴大生產。
力保優質傳統
會長兼嶺南藥廠第三代傳人呂偉強（Coty）都打算搵地起新廠。佢話，政府正訂定實施GMP嘅時間表，業界可趁機興建現代化GMP廠房，力保製藥業嘅優質傳統唔會流失，不過由於投資金額龐大，業界希望政府給予支援及時間，唔好太急進。為商會提供起廠專業意見嘅顧問雷偉國就話，要喺香港物色具規模嘅工業地唔容易，不過香港正好趁機興建一批融入環保概念嘅先進藥廠，都係好事嚟嘅。