政情：李國寶收檔皆大歡喜

有財經局官員表示，今屆立法會多個同該局有關嘅功能界別議席都換上新人，當中以金融界嘅轉變最大，對佢哋嘅裨益亦最多，事關該局當年有乜關乎銀行業嘅政策想搵李國寶幫手向業界推銷，或者游說佢加入相關法案委員會幫政府同業界發聲，最經常得到嘅回覆就係：「對……對……對……對唔住，我……我……我……我唔喺香港。」令該局相當洩氣。李國寶外號「三點不露」，根據佢過去加入委員會嘅數目同出席率，係立法會幾大懶蟲之一。反觀新任金融界議員吳亮星又勤力又勇於撐政府，要求佢入會或發言都絕少托手o架，自然深受財經局同其他政策局愛戴啦。

梁繼昌變財經局好幫手

此外，代表建制派參選會計界嘅林智遠意外落選，由泛民嘅梁繼昌（Kenneth）爆冷勝出，一度令財經局憂慮將來拉票會難咗。但經過幾個月來嘅交手，局方發現Kenneth絕非一般為鬧而鬧、為反對而反對嘅泛民，對於一啲獲得業界支持嘅政策或草案，仲會主動發言同入會幫拖。加上一向熟悉財經事務、同立場相對親政府嘅白鴿黨單仲偕重返立法會，令財經局喺議會多咗兩個好幫手。

至於張華峰接替「潮州怒漢」詹培忠當選金融服務界議員，對財經局而言可謂好壞參半，好嗰方面係張華峰比詹Sir勤力開會，而且言行較容易預測，無詹Sir咁神經刀，但張華峰嘅優點亦同時係缺點，由於佢係議會新丁，對好多有關金融服務界嘅老舊難議題，例如本地中小型經紀行嘅生存空間、延長交易時段、政府同監管機構不斷加強規管等，張華峰都會重新由頭到尾問一轉，希望逼吓政府回應同向選民交代，唔似詹Sir咁，明知解決唔到就慳番啖氣暖肚，間接令財經局要做多好多嘢。