中環出更：廖偉芬學整法包搓到手軟
廖創興家族後人廖偉芬（Jennifer）有建築師唔做，年前走去賣精品咖啡，成功進身做「咖啡王后」。月前又孭起背囊去巴黎學整麵包一個月，由搓麵粉、焗包學起，日搓麵粉六小時，搞到膊頭、手腕非常痠痛。
為做個認真嘅老闆，Jennifer走去巴黎著名廚藝學院Le Cordon Bleu及Alan Ducasse上堂。法國人視法包為「國寶」，整包只准用四種材料，就係麵粉、水、發酵粉及鹽，每條法包嘅長度及闊度，都有嚴格要求。起初學搓包，Jennifer雞手鴨腳，整咗兩次都失敗，直至第三次先過關，真係搓到手都軟埋。
未有男友試手勢
苦學一個月，終於學識整幾款法式甜品同麵包，學費盛惠兩萬幾元，Jennifer就話物有所值，佢最欣賞法國人唔賣中央供應麵包嘅專業精神。回港後，佢有意革新旗下餐廳嘅麵包部，由以往向供應商攞貨，改為製作自家出爐香噴噴麵包。問佢幾時整包畀男朋友食，Jennifer怕醜咁答：「我都想，不過依家仲未有男友。」頭啖湯，當然係留番畀細佬廖偉麟同媽咪啦。